ഇന്ത്യയിൽ നിന്നുള്ള ഭക്ഷ്യ കയറ്റുമതി വർധിപ്പിക്കാൻ ലുലു ഗ്രൂപ്പ്

ദുബായ്: ഉന്നത ഗുണനിലവാരമുള്ളതും രാസവള മുക്തവുമായ പഴം പച്ചക്കറികൾക്ക് ഗൾഫ് രാജ്യങ്ങളിൽ മികച്ച ആവശ്യകതയാണ് ഉള്ളതെന്ന് അബുദാബി ചേംബർ വൈസ് ചെയർമാനും ലുലു ഗ്രൂപ്പ് ചെയർമാനുമായ എം.എ.യൂസഫലി. ഇന്ത്യയിൽ നിന്ന് ഭക്ഷ്യോത്പാദകരുടെയും ഭക്ഷണ വസ്തുക്കളുടെ കയറ്റുമതിക്കാരുടെയും ഒരു ഉന്നത തല സംഘത്തെ എത്രയും വേഗം യു.എ.ഇ.യിലെക്ക് കൊണ്ടുവന്ന് മേഖലയുടെ പുതിയ സാഹചര്യത്തിലെ മികച്ച സാധ്യതകൾ പരിചയപ്പെടുത്താനുള്ള ഒരു സംവിധാനം ഉണ്ടാക്കണമെന്ന് യൂസഫലി കേന്ദ്ര സർക്കാരിനോട് അഭ്യർത്ഥിച്ചു.

ദുബായിൽ നടക്കുന്ന എക്സ്പോ 2020 ൻ്റെ ഭാഗമായി യു.എ.ഇ. യിലെത്തിയ കേന്ദ്ര വാണിജ്യ വ്യവസായ മന്ത്രി പീയുഷ് ഗോയലുമായി നടത്തിയ കൂടിക്കാഴ്ചയിലാണ് എം എ യൂസഫലി ഇക്കാര്യം പറഞ്ഞത്. മേഖലയിലെ സർക്കാരുകളും വ്യാപാരികളും ആഗ്രഹിക്കുന്ന തരത്തിലുള്ള ലോക നിലവാരത്തിലെ പാക്കിങ് സൗകര്യങ്ങളും കോൾഡ് സ്റ്റോറുകളും ഗവേഷണ കേന്ദ്രങ്ങളും അടക്കമുള്ള അടിസ്ഥാന സൗകര്യ വികസനത്തിന്റെ ആവശ്യകതയുണ്ട്. ലുലു ഗ്രൂപ്പ് ഇപ്പോൾ ഇന്ത്യയിലെ 11 കേന്ദ്രങ്ങളിൽ നിന്നായി പ്രതിവർഷം 7,000 കോടി രൂപയുടെ സംസ്കരിച്ച ഭക്ഷ്യവസ്തുക്കൾ കയറ്റുമതി ചെയ്യുന്നുണ്ട്. ഇത് പതിനായിരം കോടിയിലെത്തിക്കുകയാണ് ലക്ഷ്യം. ഈ വിഭാഗത്തിൽ ഇന്ത്യയിൽ ഏറ്റവും കൂടുതൽ കയറ്റുമതി ചെയ്യുന്ന സ്ഥാപനമാണ് ലുലു ഗ്രൂപ്പ്.

ഉത്തർ പ്രദേശിലെ നോയിഡയിൽ ഭക്ഷ്യ സംസ്കരണ കേന്ദ്രം ആരംഭിക്കുന്നതിനായി സംസ്ഥാന സർക്കാർ ആവശ്യമായ സ്ഥലം ഇതിനകം നൽകിയിട്ടുണ്ട്. ഇതിൻ്റെ പ്രാരംഭ പ്രവൃത്തികൾ നടക്കുകയാണ്. ഗുജറാത്തിൽ പുതിയ ഭക്ഷ്യ സംസ്കരണ കേന്ദ്രം ഹൈപ്പർമാർക്കറ്റ് എന്നിവ ആരംഭിക്കുന്നതിനുള്ള പ്രാരംഭ ചർച്ചകൾ നടക്കുന്നു. കൊച്ചി കളമശ്ശേരിയിലെ ഫുഡ് പാർക്ക്, കാശ്‌മീരിലെ ലോജിസ്റ്റിക്സ് കേന്ദ്രം എന്നിവയുടെ പ്രവർത്തനങ്ങളും പുരോഗമിച്ചു വരികയാണെന്ന് യൂസഫലി കേന്ദ്രമന്ത്രിയെ ധരിപ്പിച്ചു.

യു.എ.ഇ. ആസ്ഥാനമായുള്ള നിരവധി കമ്പനികൾ ഇന്ത്യയിലേക്ക് കൂടുതൽ നിക്ഷേപത്തിനായി തയ്യാറെടുക്കുന്നുണ്ട്. രാജ്യത്ത് ഒരു കാലത്ത് നില നിന്നിരുന്ന ലൈസൻസ് രാജിൽ നിന്നും മോദി സർക്കാരിൻ്റെ സുതാര്യമായ വാണിജ്യ വ്യവസായ നങ്ങളുടെ ഫലമായാണ് നിക്ഷേപകർ ഇന്ത്യയിലേക്ക് കൂടുതലായി വരുന്നതെന്ന് പിയൂഷ് ഗോയൽ പറഞ്ഞു. ഇന്ത്യയിൽ നിന്നും യു.എ.ഇ. അടക്കമുള്ള ഗൾഫ് രാജ്യങ്ങളിലേക്ക് ഭക്ഷ്യ വസ്തുക്കളുടെ കയറ്റുമതി ഈ സാമ്പത്തിക വർഷത്തിൽ ഇരട്ടിയാകും. ഭക്ഷ്യ കയറ്റുമതി രംഗത്ത് മുൻപന്തിയിലുള്ള ലുലു ഗ്രൂപ്പിനെ ഈ അവസരത്തിൽ അഭിനന്ദിക്കുകയാണെന്നും കേന്ദ്ര മന്ത്രി യോഗത്തിൽ പറഞ്ഞു.

ഇന്ത്യൻ സ്ഥാനപതി പവൻ കപൂർ, കോൺസുൽ ജനറൽ അമൻ പുരി, ലുലു ഗ്രൂപ്പ് എക്സിക്യൂട്ടീവ് ഡയറക്ടർ എം.എ. അഷ്റഫ് അലി, ചീഫ് ഓപ്പറേഷൻസ് ഓഫിസർ സലീം വി.ഐ, ഗ്രൂപ്പ് ഡയറക്ടർമാരായ എം.എ.സലീം, ഏ.വി. ആനന്ദ്, ഫെയർ എക്സ്പോർട്ട്സ് സി.ഇ.ഒ നജുമുദ്ധീൻ എന്നിവരും യോഗത്തിൽ സംബന്ധിച്ചു.

യു.എ.ഇ. യിലെ ഇന്ത്യൻ സ്ഥാനപതി പവൻ കപൂർ ഒരുക്കിയ അത്താഴ വിരുന്നിലും കേന്ദ്ര മന്ത്രി സംബന്ധിച്ചു. യു.എ.ഇ. വ്യാപാര മന്ത്രി താനി അഹമ്മദ് അൽ സെയുദി, ഇന്ത്യയിലെ യു.എ.ഇ. സ്ഥാനപതി അഹമ്മദ് അൽ ബന്ന, അർസലർ മിത്തൽ ചെയർമാൻ ലക്ഷ്‌മി മിത്തൽ, ഈസ അൽ ഗുറൈർ ഗ്രൂപ്പ് ചെയർമാൻ ഈസ അബ്ദുള്ള അൽ ഗുറൈർ, ഷറഫ് ഗ്രൂപ്പ് ചെയർമാൻ ഷറഫുദ്ധീൻ ഷറഫ്, എം.എ.യൂസഫലി എന്നിവരും പങ്കെടുത്തു

Leave a Reply